 |
|
Ubuntu ye'l conceutu Africanu de "humanidá hacia otros". Ye la creencia d'un enllaz universal que comparte y coneuta a tola humanidá. La mesma idea ye lo que dirixe la collaboración de la comunidá Ubuntu. Miembros de la comunidá Ubuntu que trabayen xuntos y eficazmente, y esti Códigu De Conducta amuesa los "principios base" de la nuesa cooperación. Escoyemos el nome d'Ubuntu pa la nuesa distribución porque pensamos que representa perfectamente l'espíritu de compartir y de cooperar, que ye'l corazón del movimientu del software de códigu abiertu. Nel mundu del Software Llibre, collaboramos llibremente xunto con voluntarios pa construyir un software en beneficiu de toos. Ameyoramos col trabayu fechu por otros, apurríu llibremente, y compartimos les meyores so les mesmes bases. Esta collaboración depende de les bones rellaciones ente desendolcadores. Con esti fin, aceutamos el siguiente Códigu de Conducta p'ayudar a definir el mou nel que creemos que la collaboración y la cooperación tienen de trabayar. Si quies roblar el códigu de la conducta, pues roblar la copia de Canonical en llinia.
Esti códigu de conducta cubre'l to comportamientu como miembru de la comunidá Ubuntu, en cualquier foru, llista de corréu, wiki, sitiu web, Canal IRC, install-fest (taller d'instalación), xuntanza pública o correspondencia privada. El Conseyu de la Comunidá Ubuntu va arbitrar en cualquier discutiniu sobro la conducta d'un miembru de la comunidá.
Se consideráu. El to trabayu van usalu otres persones, y tu, al empar, vas depender del trabayu d'otros. Cualquier decisión que tomes va afeutar a usuarios y colegues, y esperamos que tengas en cuenta les consecuencies al tomar decisiones. Por exemplu, cuando teamos en conxelamientu de carauterístiques, por favor nun xubas de sópitu nueves versiones de software críticu del sistema, darréu qu'una y bones, otres persones van tar probando'l sistema conxeláu y nun esperen grandes cambeos.
Se respetuoso. La comunidá Ubuntu y los sos miembros trátense unos a otros con respetu. Cualesquier miembru pue facer una perimportante contribución a Ubuntu. Nun podemos tar siempres d'alcuerdu, pero los desalcuerdos nun son escusa pal mal comportamientu y los malos modales. Toos podemos esperimentar daqué de frustración de xemes en cuando, pero nun podemos dexar que la frustración se torne n'ataque personal. Ye importante recordar qu'una comunidá au la xente se siente incómoda o amenazada nun ye bona. Esperamos que los miembros de la comunidá Ubuntu seyan respetuosos cuando traten con otros collaboradores y tamién con persones fuera del proyeutu Ubuntu, y colos usuarios d'Ubuntu.
Se collaborador. Ubuntu y el Software Llibre son collaboración y trabayu n'andecha. La collaboración amenorga la redundancia de trabayu fechu pol mundu del Software Llibre, y ameyora la calidá del software. Tendríes de collaborar con otros caltenedores d'Ubuntu, y tamién cola comunidá más avanzada que tea interesada nel trabayu que faes. El to trabayu tien de ser tresparentemente y los parches d'Ubuntu tendríen de devolvese a la comunidá cuando tean fechos, non sólo cuando hai lliberaciones de la distribución. Si quies trabayar nun códigu nuevu pa proyeutos esistentes más avanzaos, caltén esos proyeutos informando de les tos idees y progresu. Podría ser posible nun llegar a un bon consensu sobre la correuta implementación d'una idea, asina que nun sientas la obligación de tener l'aprobación enantes d'entamar, pero polo menos caltén al mundu esterior informáu del trabayu que faes, y espublízalu de mou que dexes a persones ayenes probar, aldericar y contribuyir a los tos esfuerzos.
Cuando tengas desacuerdos. Consulta a los demás. Los desacuerdos, tanto políticos como téunicos, asoceden tol tiempu y la comunidá d'Ubuntu nun ye una esceición. La meta importante nun ye evitar los desacuerdos o los diversos puntos de vista sinón resolvelos constructivamente. Tendríes de dirixite a la Comunidá y a los Procesos Comunitarios pa buscar conseyos y resolver desacuerdos. La Mesa Téunica (Technical Board) y el Conseyu Comuñal (Community Council), van ayudate a decidir el camín correutu pa Ubuntu. Tamién hai munchos Equipos de Proyeutu y Llíderes d'Equipu, que podríen ayudate a atopar la direición más aceutable. Si de verdá quies tomar un camín distintu, entós animámoste a crear una distribución derivada o facer disponible un conxuntu alternativu de paquetes usando la estructura d'Alministración de Paquetes d'Ubuntu, de manera que la comunidá pueda probar los tos cambeos ya idegues pa sí mesma y contribuyir al discutiniu.
Cuando tengas inseguridá. Pidi ayuda. Naide sabe de too, y nun s'espera que naide seya perfeutu na comunidá Ubuntu. Facer entrugues evita dempués munchos problemes nel camín, polo tanto anímate a entrugar. Aquellos a los que se-yos vas entrugar van ser receptivos y collaboradores. Sicasí, al facer una entruga, tienes de tomate curiáu pa faelo nel foru apropiáu: Les entrugues fuera de tópicu, como peticiones d'ayuda nuna llista de corréu pa desendolcu, resten valor a la discusión.
Renuncia responsablemente. Los desendolcadores en tou proyeutu van y vienen y Ubuntu nun ye distintu. Cuando dexes un proyeutu, en parte o en tou, pidímoste que lo faigas de manera qu'evites la interrupción del proyeutu. Esto significa que tendríes de avisar al restu de la to marcha y dar los pasos afayadizos pa llograr qu'otros puedan retomar el proyeutu onde tu lu dexes.
